‘Die Ouditeur-generaal se verslag beklemtoon ‘n diep munisipale finansiële krisis’

Saamgestel deur Nadia Pieters
Jun 24
1 min read

Slegs 15% van munisipaliteite het skoon oudits in die 2024-'25 finansiële jaar behaal.

Die Ouditeur-generaal, Tsakani Maluleke, het die plaaslike regeringsoudituitkomste Woensdag in die parlement ter tafel gelê.

Volgens die VF Plus toon die verslag ernstige finansiële wanbestuur en korrupsie in plaaslike regering.

Die party se Michal Groenewald voeg by dat 123 munisipaliteite tegnies bankrot is, terwyl baie met voortdurende kontantvloeiprobleme worstel en nie diensverskaffers betyds betaal nie.

Groenewald wys ook op onreëlmatige uitgawes wat miljarde rand beloop en waarsku dat onderbefondsde begrotings en swak verantwoordbaarheid dienslewering ondermyn.

Volgens hom beklemtoon die bevindinge die behoefte aan sterker finansiële beheermaatreëls en beter bestuur in munisipaliteite regoor die land.