Die UV verbeter die behandeling van skildklierpasiënte

Pasiënte met sekere skildklierafwykings kan nou meer akkurate en persoonlike behandeling ontvang danksy nuwe tegnologie by die Universiteit van die Vrystaat.

Die universiteit se Fakulteit Gesondheidswetenskappe het 'n nuwe stelsel aangeskaf wat dokters help om die regte dosis radioaktiewe jodium vir elke pasiënt te bepaal.

Volgens die universiteit kan die tegnologie help om behandeling meer doeltreffend te maak, onnodige blootstelling aan bestraling te verminder en die kans op herhaalde behandeling te verklein.

Die stelsel meet hoeveel van die jodium deur 'n pasiënt se skildklier opgeneem word en gebruik dié inligting om 'n meer persoonlike behandelingsplan saam te stel.

Die universiteit sê die tegnologie sal ook opleiding, navorsing en die ontwikkeling van toekomstige mediese spesialiste ondersteun.

FOTO: Universiteit van die Vrystaat