Nóg ‘n voorverhoor is in die Bester-saak geskeduleer

Saamgestel deur Nadia Pieters
Jun 18
1 min read

Nóg 'n voorverhoor in die Thabo Bester-ontsnappingsaak vind na verwagting Vrydag in die Vrystaatse Hooggeregshof in Bloemfontein plaas.

Volgens SABC News sal die hof die status van verskeie uitstaande sake bespreek voordat die voorlopige verhoordatum van 20 Julie tot 18 Augustus aanbreek.

Bester en sy medebeskuldigdes staan onder meer tereg op aanklagte wat verband hou met sy ontsnapping uit die Mangaung-gevangenis in 2022, brandstigting en die skending van 'n lyk.

Tydens vorige hofverskynings het Bester en Nandipha Magudumana aangevoer dat verskeie hangende aansoeke hul voorbereiding vir die verhoor beïnvloed.

Die hof sal na verwagting ook 'n bywerking ontvang oor Magudumana se aansoek in die Konstitusionele Hof waarin sy die wettigheid van haar inhegtenisneming en deportasie uit Tanzanië betwis.