Ramaphosa sê die aanklagkomiteevoorsitter sal hom nie kan beskerm nie

President Cyril Ramaphosa sê die voorsitter van die Artikel 89-aanklagkomitee oor die Phala Phala-aangeleentheid sal hom nie kan beskerm nie. Ramaphosa sê Makashule Gana kan nie beheer wat lede van die aanklagkomitee in ’n openbare sitting sê nie, en ook nie wat die media en die publiek daaroor herhaal nie.

Netwerk24 berig Ramaphosa sê ongeag hoe nougeset die verrigtinge van die openbare sittings bestuur word, bly dit strafgerig en gaan dit met diepe vernedering gepaard. Hy wys ook daarop dat Gana aangevoer het dat hy die reëls sou afdwing om ’n billike proses te verseker en om onnodige of ongegronde aanvalle te voorkom.

Die president sê Gana se besluit om die aansoek te bring en hom te skaar by die betoog dat Ramaphosa se hersieningsaansoek swak is, verminder die gerusstelling wat Gana se versekering bied.

Die ATM, EFF en die aanklagkomitee het by die konstitusionele hof aansoek gedoen om die hooggeregshof in Kaapstad se bevel wat die komitee se werk tydelik gestaak het, tersyde te laat stel.

Makashule Gana. FOTO: The Namibian