Rand verswak ná begrotingstoespraak se kansellasie

Die Suid-Afrikaanse rand het Woensdagmiddag verswak ná die skielike kansellasie van minister Enoch Godongwana se Begrotingstoespraak vir 2025. The South African berig die toespraak sou om 14:00 begin. Die Speaker van die Nasionale Vergadering, Thoko Didiza, het 15 minute later aangekondig dit is uitgestel, ná meningsverskille binne die Regering van Nasionale Eenheid (RNE) oor die begrotingsvoorstelle. Daar is wyd berig BTW sou moontlik met twee persentasiepunte styg, van 15% tot 17%. ’n Uitgelekte belastingopsomming vir 2025 het dit blykbaar bevestig. Die begroting word nou in Maart 2025 verwag, maar sonder ’n bevestigde datum. Voor die kansellasie het die rand teen 18.41 per dollar verhandel en beleggers het na leidrade oor fiskale hervormings en bestedingsplanne gesoek.