johleen olivier

Ek is Johleen Olivier en is in Krugersdorp gebore. My skoolloopbaan het in Bloemfontein by President Brand Laerskool begin en ek het in Kroonstad by die Afrikaanse Hoërskool (Rooi Skool) gematrikuleer.

Ná skool het ek in ’n apteek begin werk, later in die bankwese beland, en toe selfs vir ’n ruk as eiendomsagent gewerk. Dit was egter radio wat uiteindelik my hart gewen het.

My pad het my in 1989 by die SAUK (later SABC) se bemarking en verkope-afdeling gebring, waar ek vinnig bevorder is. In 1994, toe die streeksradiostasies verkoop is, het ek saam met Radio Oranje (later OFM) aangegaan as Bemarking- en Verkoopsbestuurder en vir jare regoor die land ander radiostasies gehelp om hul verkoopsafdelings op te bou.

Sedertdien het ek my tuiste by Rosestad 100.6FM gevind, waar ek vanaf 2020 die Bemarking- en Verkoopsbestuurder is. Radio is my passie.

Buite die werk is my familie my anker en grootste vreugde. Ek en my man het ’n dogter, ’n wonderlike skoonseun en twee kleinkinders wat my hart steel – elkeen soos my eie.

Ek is lief daarvoor om in my tuin te werk, onlangs het ek begin brei, en ek lees graag biografieë wat inspirasie en lewenslesse bied.