STOEI: Lenerd van Schalkwyk verower silwer by die Great British Wrestling Grand Prix

Armando Pieters
Nov 4
1 min read

Die Suid-Afrikaanse jong stoeier, Lenerd van Schalkwyk, het ’n silwermedalje verower tydens die Great British Wrestling Grand Prix in Manchester. Hy het in die U20 vryestyl-afdeling vir 57kg meegeding en ’n indrukwekkende vertoning gelewer om die tweede plek te verseker.

Van Schalkwyk beskryf die toernooi as kleiner in formaat, maar met baie sterk internasionale deelname. Hy sê die ervaring was besonder waardevol. Volgens hom was sy fiksheid en spoed op ’n goeie vlak, en senuwees het slegs in sy eerste wedstryd ’n rol gespeel.

Die Pretoria-gebaseerde stoeier sien die Grand Prix as sy laaste kompetisie vir die jaar. Hy beplan ’n kort rustyd voordat hy weer met voorbereiding begin.

Sy volgende mikpunt is die Nasionale Spanproewe in Februarie, waarná hy hoop om vir die Afrika-Kontinentale Kampioenskappe in 2026 te kwalifiseer.