OGGEND SPORT: Australië klop vir SA in ‘n reëngeteisterde derde ODI, Die Flexbrands Knights mik na ‘n eerste Pro20-oorwinning en, die Sharks is gereed vir ‘n groot toets
Ons begin met krieket: Australië het Suid-Afrika se kans om skoonskip te maak in die eendag-reeks beëindig nadat die besoekers die derde en laaste wedstryd in Potchefstroom met 45 lopies volgens die Duckworth-Lewis-Stern-metode gewen het.
The Guardian berig Australië het 322 vir nege aangeteken, met Alex Carey wat 74 lopies geslaan het en Mitch Marsh 56. Suid-Afrika se jaagtog is weens reën tot 28 boulbeurte beperk, met die Proteas op 145 vir vier toe die wedstryd beëindig is. Ryan Rickelton was Suid-Afrika se voorste kolwer met ’n onoorwonne 71.
Die Proteas het intussen hul voorlopige groep vir die komende toetsreeks teen Australië aangekondig.
SuperSport berig Kagiso Rabada en Marques Ackerman is ingesluit, terwyl Gerald Coetzee, Anrich Nortje en Dane Paterson na die toetsgroep terugkeer.
Die eerste toets begin op 9 Oktober in Durban.
In plaaslike krieket: Die Flexbrands Knights sal Vrydag op tuisbodem op soek wees na hul eerste oorwinning in die nuwe YesPlay Pro20-beker wanneer hulle die Momentum Multiply Titans by die Mangaung Oval in Bloemfontein pak.
Volgens Krieket Suid-Afrika begin die wedstryd om 18:00.
Die Flexbrand Knights het hul eerste twee wedstryde van die kompetisie verloor — teen die YesPlay WP Cobras in Kaapstad en Boland in die Paarl. Teen Boland het die Knights eerste gekolf en 160 vir vyf aangeteken, maar die tuisspan het die teiken met die laaste bal van die wedstryd bereik.
Die Flexbrands Knights sal dus hoop om voor hul tuisskare hul eerste Pro20-oorwinning te behaal.
En, in rugby-nuus: Die Hollywoodbets Sharks kry Saterdag ’n vroeë geleentheid om hul goeie begin tot die nuwe URC-seisoen voort te sit wanneer hulle die verdedigende kampioene, Leinster, op Kings Park in Durban pak.
The Citizen berig die Sharks het verlede naweek hul veldtog met ’n oortuigende bonuspunt-oorwinning van 41-24 oor die Ospreys begin. Die Durbaniete wil dié momentum nou teen ’n veel sterker Leinster-span behou. Flank Phepsi Buthelezi sê dit is ’n belangrike week vir die span en dat hulle op hul vertoning teen die Ospreys wil voortbou.
Leinster het intussen ook hul eerste wedstryd van die seisoen verloor — met die Lions wat hulle verlede Saterdag in Johannesburg met 27-26 geklop het.
Comments