Centlec werk steeds om kragtoevoer ná stormskade te herstel

Kragtoevoer is in die meeste Mangaung-gebiede herstel ná Donderdag se sterk winde en donderstorms, maar sommige inwoners is vanoggend steeds sonder elektrisiteit.

Volgens Centlec se waarnemende woordvoerder, Tseliso Leba, is herstelspanne reeds in verskeie gebiede ontplooi, waaronder Bloemdal, Bayswater, Vistapark, Bergman, Spitskop, Bainsvlei en Kwaggafontein.

Centlec moes vroeër Vrydagoggend ook ’n noodonderbreking instel om ’n gebreekte kragpaal op die Kagisanong-toevoerlyn te vervang. Dit raak gebiede soos Rocklands, Bloemanda, Fase 2 en Hillside View.

Inwoners word versoek om nuwe kragonderbrekings by Centlec aan te meld sodat herstelspanne dit kan ondersoek.

Ter illustrasie. FOTO: ActionSA