Gemeenskapslede in Bothaville betoog

Die polisie in die Vrystaat het twee dossiere van openbare geweld geopen nadat ‘n groep betogers in Bothaville paaie met klippe versper het. Volgens ’n polisieverklaring het ontevrede gemeenskapslede Woensdag in Khotsong, ’n township in Bothaville, bymekaargekom om ‘n optog na die Nala-munisipaliteit se kantore te hou. Hulle wil ‘n memorandum oorhandig nadat ’n vergadering wat vir die vorige week Vrydag beplan was, gekanselleer is. Skole in Khotsong was Woensdag weens die betoging ontwrig en was gesluit. Die Nala-munisipaliteit se kantore in Bothaville was ook gesluit, terwyl die polisie die situasie gemonitor het.