‘n Voormalige VS burgemeester bewoon steeds haar staatswoning

Die voormalige burgemeester van die Tswelopele-munisipaliteit in die Vrystaat woon steeds in haar staatswoning in Hoopstad. Dit ten spyte van die feit dat sy reeds uit haar amp verwyder is.

Netwerk24 berig die LUR vir openbare werke en infrastruktuur in die Vrystaat, Dibolelo Mance, het bevestig Kenalemang Phukuntsi woon steeds in die huis. Mance het egter gesê Phukuntsi bewoon nie die eiendom op grond van haar pos as burgemeester nie. Sy sê die departement is besig met ’n proses om die situasie te regulariseer.

Die DA se woordvoerder oor openbare werke en infrastruktuur in die provinsiale wetgewer, Dulandi Leech, sê dat Mance nie ’n duidelike verduideliking kon gee oor die gesag waarvolgens sy steeds daar woon nie.

Navrae is aan die woordvoerder van die departement, Mlungisi Maqubela, gerig.

Kenalemang Phukuntsi. FOTO: Facebook