Gesteelde Centlec-toerusting is in Batho teruggevind
Gesteelde elektriese infrastruktuur ter waarde van sowat R225 000 is tydens ’n polisie-operasie in Batho teruggevind.
Volgens die waarnemende woordvoerder van Bloemfontein se kragvoorsiener, Centlec, is die operasie in Sesingstraat uitgevoer nadat ’n wenk van ’n gemeenskapslid ontvang is.
’n Centlec-werknemer is tydens die operasie in besit van elektriese items gevind wat vermoedelik van die maatskappy gesteel is. Die werknemer werk as ’n vakman-assistent in die kragonderbrekingsafdeling.
Die items sluit koperkabels, lugkabels, kabelklemme en sekeringe in. Volgens voorlopige ondersoek is van die kabels verbrand om die buitenste omhulsel te verwyder.
Die werknemer is in polisie-aanhouding en sal na verwagting by die Batho-landdroshof om borgtog aansoek doen. Centlec het ook interne dissiplinêre stappe teen hom begin.
Comments