MIDDAG SPORT: Brevis weier om sy aanvallende styl te verander, Segner word vir die res van die All Blacks-toer uitgesluit en Wawrinka kry Amerikaanse Ope-promotorsuitnodiging
- Saamgestel deur Jana Roos
- Aug 27
- 2 min read
Ons slaan af met krieket-nuus: Die Proteas-kolwer, Dewald Brevis, sê hy voel ten volle ondersteun deur afrigter, Shukri Conrad, en is nie van plan om sy natuurlike aanvallende styl te verander in sy strewe na groter bestendigheid nie.
Die 23-jarige, wat reeds dertig T20-internasionale wedstryde agter die blad het, lei ‘n jong Suid-Afrikaanse span wat Namibië besoek vir ‘n T20 Internasionale-driehoekreeks teen Namibië en Zimbabwe, gevolg deur ‘n eendagwedstryd-reeks van drie wedstryde teen die gasheerspan.
Brevis, wat die Proteas se hoogste T20 Internasionale-telling van ‘n onoorwonne 125 op sy naam het, glo dat bestendigheid met ervaring sal kom en meen dit is noodsaaklik om getrou te bly aan sy spel, op sy vermoëns te vertrou en sy krieket te geniet.
LUISTER HIER:
In rugby-nuus: Die All Blacks-losskakelvoorspeler, Anton Segner, sal die res van Nieu-Seeland se toer deur Suid-Afrika misloop nadat hy ‘n artroskopiese operasie aan ‘n geswelde enkel ondergaan het.
Die 25-jarige het beïndruk in die wedstryde teen die Stormers en die Bulls, maar moes noodgedwonge aan Saterdag se eerste toetswedstryd onttrek, terwyl vier ander beseerde All Blacks reeds na hul tuisland teruggekeer en twee ander herstel van harsingskuddings.
Slot Patrick Tuipulotu het as kaptein vir Nieu-Seeland teen die Lions opgetree en mag dalk Saterdag in Kaapstad na die toetsspan terugkeer nadat Josh Lord ‘n harsingskudding opgedoen het . Die All Blacks se hoofafrigter, Dave Rennie, het die oorwinning as ‘n wisselvallige vertoning beskryf nadat sy span aanvanklik met 35-17 agtergeloop het voordat hulle teruggeveg het.
En, in tennis-nuus: Die Amerikaanse Ope het Stan Wawrinka ’n promotorsuitnodiging gegee nadat aanhangers sy aanvanklike uitsluiting sterk gekritiseer het, met die 41-jarige voormalige kampioen wat aan sy laaste seisoen van beroepstennis deelneem.
Wawrinka het Dinsdag emosioneel van die toernooi afskeid geneem, maar sal nou wel in New York speel nadat hy vanjaar reeds promotorsuitnodigings vir die Australiese Ope, Franse Ope en Wimbledon ontvang het.
Venus en Serena Williams sal ook in die vrouedubbelspel meeding nadat hulle ’n promotorsuitnodiging gekry het.
Intussen het Karolina Muchova en Jakub Mensik die gemengde dubbelspeltitel verower met ’n 6-3, 1-6, 10-6 oorwinning oor Belinda Bencic en Flavio Cobolli, hul eerste Grand Slam-titel.
Comments