MIDDAG SPORT: Die Sharks en die Lions staan voor deurslaggewende wegwedstryde, die Flexbrands Knights hoop om momentum te hou en, Hamilton se droom van 'n Afrika-Grand Prix kan sy loopbaan verleng
Ons skop af met rugby-nuus: Vier Suid-Afrikaanse spanne beklee tans plekke in die top-sewe van die Vodacom Verenigde Rugby Kampioenskap, met die dat al vier vir die eerste keer in die kompetisie se geskiedenis die uitspeelplekke in die top-agt kan haal.
Die Hollywoodbets Sharks het ’n uitdagende taak teen Cardiff, terwyl die 10Bet Lions wat tans boaan die punteleer staan na Edinburgh reis. Die Vodacom Bulls en DHL Stormers geniet intussen tuisvoordeel in die volgende twee rondes, met die Stormers wat tuis teen die Scarlets speel en daarna teen Ulster, terwyl die Bulls teen dieselfde teenstanders in die omgekeerde volgorde te staan kom.
Elders word verwag dat die Ierse derby tussen Leinster en Munster ’n groot hoogtepunt van die ronde sal wees, met die hewige wedywering tussen die twee spanne wat vergelyk word met die kragmetings tussen die Stormers en die Bulls.
In krieket-nuus: Die Flexbrands Knights hoop om hul onlangse oorwinning in die Pro20-bekerkompetisie in verdere sukses om te skakel wanneer hulle Saterdag in Bloemfontein teen die Mpumalanga Rhinos speel.
Die Flexbrands Knights het hul eerste oorwinning van die seisoen behaal toe hulle Suid-Afrika Emerging met 54 lopies geklop het. Die span het 206 vir ses aangeteken, voordat hulle hul teenstanders tot 152 vir ses beperk het.
Die aanvangskolwer Jonathan Bird was die uitblinker met ’n indrukwekkende 97 lopies van net 46 balle, terwyl Gihahn Cloete 41 lopies bygedra het. Die Flexbrands Knights se boulers het daarna die druk behou. Die oorwinning bied ’n welkome hupstoot vir die Bloemfonteinse span ná ’n moeilike begin in die topafdeling.
Die Knights ontvang die Rhinos Saterdag om 18:00 by die Mangaung Oval.
En, in motorsport-nuus: Lewis Hamilton sê sy droom om aan 'n Grand Prix in Afrika deel te neem, kan hom oorreed om sy Formule 1-loopbaan te verleng, veral in die lig van 'n ooreenkoms dat Rwanda 'n wedren in die vroeë 2030's sal aanbied.
Die voorgestelde wedren in Rwanda het egter kritiek van Amnesty International uitgelok weens bekommernisse oor menseregte.
Hamilton erken dat hierdie kwessies bestaan, maar spreek die hoop uit dat die geleentheid tot groter bewustheid en sinvolle gesprekvoering kan lei. Die sewemalige wêreldkampioen, wat in Januarie 42 word en tot die einde van 2027 onder kontrak by Ferrari is, sê hy sal voortgaan solank hy sy fiksheid kan handhaaf en sterk uitslae kan behaal.
Comments