MIDDAG SPORT: Die Cheetahs keer terug na die basiese beginsels, Morkel neem die leisels by die Joburg Super Kings oor en SAFA is nader aan die aanstelling van ‘n Bafana-afrigter

Saamgestel deur Jana Roos
Jul 31
2 min read

Ons begin met rugby-nuus: Die Toyota Cheetahs sê hulle keer terug na die basiese beginsels vir hul eerste wegwedstryd van die Carling Curriebeker-seisoen.

Die Vrystaters reis na Kimberley, waar hulle Vrydagaand om 19:00 teen Suzuki Griekwas in ’n sentrale Suid-Afrikaanse derby te staan kom. Hoofafrigter Frans Steyn sê in ‘n verklaring die span verwag ’n taai wedstryd, maar glo hul spelplan kan die verskil maak. Volgens Steyn bied die wedstryd ook geleenthede vir sy span.

Steyn het intussen sy span vir die kragmeting aangekondig, met verskeie veranderinge aan die opdrafspan ná verlede week se wedstryd teen die Sharks.

In krieket-nuus: Die voormalige Suid-Afrikaanse veelsydige speler, Albie Morkel, is aangestel as hoofafrigter van die Joburg Super Kings vir die komende SA20-seisoen.

Morkel het Suid-Afrika tussen 2004 en 2015 in een toetswedstryd, 58 eendagwedstryde en 50 T20-internasionale wedstryde verteenwoordig, insluitend ‘n indrukwekkende plaaslike T20-loopbaan waarin hy meer as vierduisend lopies aangeteken en byna 250 paaltjies geneem het.

Die konsessie se eienaars het sy begrip van die Super Kings-kultuur, sy leierseienskap en sy bydrae tot spelersontwikkeling geprys. Morkel het die aanstelling as ‘n groot eer bestempel en sê hy sien daarna uit om op die span se stewige fondament voort te bou, met die vyfde SA20-seisoen wat op 17 Januarie volgende jaar begin.

En, in sokker-nuus: SAFA sê hy is naby om ‘n opvolger aan te stel vir Bafana Bafana-afrigter, Hugo Broos, wie se kontrak môre verstryk.

Na verwagting sal die tegniese komitee sy finale aanbeveling maak voordat die Nasionale Uitvoerende Komitee die aanstelling goedkeur, terwyl voorsitter, Jack Maluleke, sê die nuwe afrigter moet by die ambisie wat Broos getoon het, kan kers vashou.

Berigte dui daarop dat Broos genader is om sy termyn tot aan die einde van volgende jaar se Afrikabeker-toernooi te verleng, hoewel daardie opsie dalk nie sal realiseer nie. Maluleke het ook die aanstelling van plaaslike afrigters gesteun en gesê Suid-Afrika beskik oor die afrigtingstalent wat nodig is om beide die senior en junior nasionale spanne te lei.