MIDDAG SPORT: Die ICONS Cup keer na Suid-Afrika terug, Tatjana swem vir Nederland en, Span SA sluit die Jeug Olimpiese Spele met ‘n rekordmedaljestand af
In gholf-nuus: Die ICONS Cup South Africa sal sportlegendes van regoor die wêreld na die gholfbaan by Fancourt in George bring van 11 tot 13 Desember.
Die driedaagse wedstrydspelkompetisie sal Span Suid-Afrika teen Span Wêreld sien te staan kom, met atlete van rugby, krieket, sokker, gholf, swem en tennis wat hul gewone sportarenas vir die gholfbaan sal verruil.
Die viermalige major-kampioen, Ernie Els, sal Suid-Afrika aanvoer, terwyl die tweemalige Masters-wenner, José María Olazábal, die internasionale span sal lei.
In swem-nuus: Die Suid-Afrikaanse Olimpiese swemkampioen Tatjana Smith gaan voortaan Nederland verteenwoordig. Smith, wat vier Olimpiese medaljes vir Suid-Afrika verower het, het haar besluit in ’n emosionele video aangekondig.
Volgens VnExpress het finansiële uitdagings en ’n dispuut met Swem Suid-Afrika oor ’n bonus van $35 000 ná die 2023-Wêreldkampioenskap tot haar besluit bygedra. Die bonus is uiteindelik betaal, maar die rente daarop eers ná regsoptrede. Smith het reeds in September na mededingende swem teruggekeer en sal na verwagting volgende maand haar amptelike debuut vir Nederland by die Wêreldkortbadkampioenskap in Beijing maak.
Sy sal steeds in Suid-Afrika woon en oefen.
En atletiek-nuus: Suid-Afrika se jong atlete het die land se beste medalje-oes nóg by die Jeug Olimpiese Spele behaal.
Die span het die kompetisie in Dakar, Senegal, met altesaam elf medaljes afgesluit – twee meer as die vorige rekord van nege, wat in 2010 opgestel is.
Volgens Good Things Guy het Megan Nieman goud in die vroue se 400 meter-hekkies verower, terwyl die 17-jarige Matao le Roux die hoogspring vir mans gewen het. Enrique Bosch het brons in die 110 meter-hekkies ingepalm en Milan Blignaut silwer in die vroue se hoogspring.
Dit is ’n sterk vertoning deur Suid-Afrika se volgende geslag sportsterre.
Comments