MIDDAG SPORT: Die Proteas verloor, SA maak geskiedenis in New York en Chelsea word met miljoene beboet

Ons begin met nuus uit die wêreld van krieket... Nieu-Seeland het Suid-Africa met 68 lopies geklop in Dinsdag se T20 wedstryd. Die Proteas het op 107 te staan gekom, nadat die Swart Pette 175/7 bereik het.

Voor Dinsdag se kragmeting het Suid-Afrika 'n voorsprong van 1-0 in die reeks gehad, na 'n oorwinning met sewe paaltjies in die eerste wedstryd in Mount Maunganu. Hier het hulle die gashere vir slegs 91 lopies uitgehaal.

In atletiek-nuus… In ‘n wêreld-eerste het ‘n Suid-Afrikaner die New York Half Marathon gewen.

Die langafstandatleet, Adriaan Wildschutt, het 'n indrukwekkende vertoning gelewer om die padwedloop in die Groot Appel te wen. Met 'n tyd van 59:30 het hy die grootste padoorwinning van sy loopbaan verseker.

Volgens 'n artikel deur TeamSA het die 27-jarige, van Ceres in die Wes-Kaap, 'n beslissende oplewing in die laaste stadium van die wedloop gelewer, weggebreek van die voorste groep rondom die 18 km-merk en oor die laaste kilometers gestrek.

The Witness berig Wildschutt het geduldig deur die vroeë stadiums gehardloop en energie bespaar terwyl die voorste groep die tempo aangegee het. Toe die wedloop sy laaste skof binnegegaan het, het hy skerp versnel, en die agtervolgende groep kon nie reageer nie.

Hellen Obiri van Kenia het die oorwinning in die vrouewedloop in 1:06:33 behaal en die baanrekord gebreek.

In rugby-nuus: Die Eagles het na die bopunt van die Varsitybeker-punteleer geklim met ‘n 30-22 oorwinning oor UP-Tuks, terwyl FNB Maties ‘n oorheersende 34-7 bonuspunt-oorwinning weg teen UCT Ikeys in die Kaapse derby behaal het.

Die Universiteit van Johannesburg het hul halfeindstryd-hoop lewendig gehou met ‘n moeisame 29-17 oorwinning oor die Shimlas.

Onderaan die tabel het FNB Emeris die Ixias met 26-24 geklop in ‘n gespanne relegasiestryd, en in die slotfases vasgehou om hul eerste oorwinning van die veldtog te verseker.

En in sokker-nuus… Chelsea is met £10.75 miljoen (meer as 230 miljoen rand) beboet, en het 'n opgeskorte oordragverbod van een jaar ontvang, in verband met historiese oortredings van Premierliga-reëls.

EWN berig die sanksies hou verband met inligting wat met die liga gedeel is deur die konsortium - onder leiding van die Amerikaanse sakeman Todd Boehly - ná hul oorname van Chelsea by die Russiese miljardêr Roman Abramovich in 2022.

Die Premierliga het bevind dat tussen 2011 en 2018 onbekende betalings deur derde partye wat met Chelsea geassosieer word, aan spelers, ongeregistreerde agente en ander gemaak is.