MIDDAG SPORT: Die Springbokke is gereed vir hul eerste All Blacks-toets, die Cheetahs mik vir nog ’n Curriebeker-oorwinning en Pegula en Swiatek lei die stryd in Cincinnati

Saamgestel deur Jana Roos
Aug 21
2 min read

Ons begin met rugby-nuus: Die Springbokke se aandag is op die Rugby’s Greatest Rivalry-reeks, met Nieu-Seeland wat Saterdagmiddag in die eerste van vier toetse teen Suid-Afrika uitdraf.

Die wedstryd word by Ellispark in Johannesburg gespeel, met Pieter-Steph du Toit as kaptein nadat Siya Kolisi weens ’n dyspierbesering uit die beginspan gelaat is. Damian de Allende speel ook sy 100ste toets vir die Springbokke.

Reuters berig die Bokke het hul laaste ses wedstryde teen die All Blacks gewen, insluitend ’n rekordoorwinning van 43-10 in Wellington verlede jaar.

Die Toyota Cheetahs is terug in aksie in die Carling Curriebeker, nadat hulle verlede naweek die Bulls XV met 62-52 in Pretoria geklop het.

Die Cheetahs ontvang Sondag die Sanlam Boland Kavaliers by die Toyota-stadion in Bloemfontein, met afskop om 15:00.

Die Vrystaters is nou in ’n belangrike deel van die kompetisie, met slegs ’n paar wedstryde oor voordat die halfeindstryde begin. Die Cheetahs sal dus daarop fokus om nog ’n oorwinning en waardevolle ligapunte op eie bodem te verseker.

Ons sluit af met tennis-nuus: Die wêreldnommer drie, Jessica Pegula, het deurgedring na die halfeindronde van die Cincinnati Meesters nadat sy haar mede-Amerikaner, Amanda Anisimova, met 6-4, 2-6, 7-6 geklop het.

Die verdedigende kampioen, Iga Swiatek, het ook deurgedring nadat Elena Rybakina weens ‘n besering in die eerste stel onttrek het, wat kommer laat ontstaan oor die Kazak se fiksheid voor die Amerikaanse Ope.

In die mansafdeling het Italië se Flavio Cobolli teruggeveg om Tommy Paul met 2-6, 6-3, 6-4 te klop, terwyl Arthur Fils vir Thiago Tirante in slegs 64 minute verslaan het om ‘n halfeindstryd teen Cobolli te verseker.

Intussen het Carlos Alcaraz bevestig dat hy by die Amerikaanse Ope sal terugkeer ná ‘n afwesigheid van vier maande weens ‘n polsbesering, met die Spanjaard wat sy titel in New York sal verdedig.