MIDDAG SPORT: Die Springbokke wend hulself na ervaring, die Leeus gee die All Blacks ‘n nagmerrie en Fernandes wen ‘n gesogte PFA-toekenning
- Saamgestel deur Jana Roos
- 2 hours ago
- 2 min read
Ons skop af met rugby-nuus: Springbok-afrigter, Rassie Erasmus, het vir Saterdag se tweede toets in Kaapstad se Rugby’s Greatest Rivalry-Toets op ervaring staatgemaak, met die 39-jarige Deon Fourie wat teruggeroep is na die plaasvervangersbank, nadat hy vir die Stormers teen die All Blacks beïndruk het.
Hierdie stap volg op verlede naweek se swaar nederlaag in Johannesburg, wat Erasmus genoop het om te steun op spelers wat die span voorheen uit moeilike situasies gehelp het.
Daar is ook vertroue in Handré Pollard geplaas om die span te lei, terwyl die terugkeer van ervare spelers soos Lood de Jager en Thomas du Toit die verskuiwing weg van die beleid om jonger spelers te roteer, beklemtoon.
Erasmus sê hoewel die Springbokke soortgelyke situasies al voorheen oorkom het, bly dit steeds ‘n moeilike posisie om in te wees.
LUISTER HIER:
Die All Blacks moes diep delf om die Leeus met 41-35 op Ellispark te klop, nadat die tuisspan vir groot dele van die wedstryd op koers was vir ’n opskudding.
Die Leeus het uitstekend verdedig en met drieë deur Nico Steyn, Siba Mahashe, Kelly Mpeku, Erich Cronjé en Francke Horn ’n voorsprong van 35-17 opgebou. Nieu-Seeland het teruggeveg om die telling om te keer, maar die Leeus het tot in die slotfase bly glo, met Steyn, Mahashe en Batho Hlekani onder hul beste spelers, voordat die All Blacks uiteindelik die oorwinning beklink het.
Lions-afrigter, Ivan van Rooyen, het sy spelers se passie en werksetiek geprys, ten spyte daarvan dat hulle in die laaste 12 minute punte afgestaan het.
LUISTER HIER:
Ons sluit af met sokker-nuus: Manchester United se kaptein, Bruno Fernandes, is aangewys as die PFA-speler van die jaar ná ‘n uitstekende 2025/26-seisoen waarin hy ‘n nuwe Premierliga-rekord van 21 bystanddoele opgestel het.
Die Portugese middelveldspeler het ook nege doele aangeteken terwyl United van ‘n moeilike begin herstel het om derde te eindig en hy voeg hiermee die PFA-toekenning by die eer wat hy reeds van die Football Writers’s Association ontvang het.
Comments