MIDDAG SPORT: Die WTA stel hul genetiese toetsbeleid bekend, Bangladesj beklink ‘n reeks-oorwinning en Engelse sokker treur oor Kevin Keegan

Saamgestel deur Jana Roos
Jul 21
2 min read

Ons slaan af met tennis-nuus: Die WTA-reeks vereis voortaan dat spelers ’n eenmalige genetiese toets vir die SRY-geen slaag om vir vrouetoernooie te kwalifiseer, met die nuwe beleid wat Dinsdag in werking tree.

Die vorige reëls het transgender vroue toegelaat om deel te neem indien hulle hul testosteroonvlakke vir twee jaar onder ’n vasgestelde vlak gehou het, hoewel daar tans geen bekende transgender vroue in beroepstennis aktief is nie. Die WTA sê die toetsproses sal met streng vertroulikheid en databeskerming bestuur word, terwyl uiteenlopende standpunte oor transgender deelname deur figure soos Martina Navratilova, Aryna Sabalenka en Billie Jean King beklemtoon word.

Die besluit bring die WTA in lyn met ander internasionale sportfederasies en die Internasionale Olimpiese Komitee, terwyl die debat oor regverdigheid en diskriminasie in sport steeds voortduur.

In krieket: Bangladesj se waarnemende kaptein, Towhid Hridoy, het sy span se veerkragtigheid geprys nadat hulle ‘n T20-internasionale reeks oor Zimbabwe met 2-1 beklink het, deur die beslissende wedstryd in Bulawayo met vier paaltjies te wen.

Hridoy, wat die span in die plek van die beseerde Litton Das gelei het, sê die sukses is veral bevredigend aangesien Bangladesj te kampe gehad het met ‘n toenemende lys beserings, wat beteken het dat slegs 13 spelers teen die einde van die toer beskikbaar was.

Hy het ook die plaasvervanger- snelbouler, Abdul Gaffar Saqlain, geprys omdat hy na vore getree het ná Nahid Rana se besering, en gesê dat die jong speler ‘n belangrike bydrae in die beslissende wedstryd gelewer het.

En, in sokker-nuus: Die voormalige Liverpool-, Newcastle- en Engeland-ster, Kevin Keegan, is in die ouderdom van 75-jaar ná ’n stryd teen kanker oorlede, met huldeblyke wat van regoor die sokkerwêreld instroom.

Keegan was ’n dubbele Ballon d’Or-wenner wat drie Engelse ligatitels, die FA-beker en die Europese Beker met Liverpool gewen het, terwyl hy ook die Bundesliga-titel met Hamburg verower en 21 doele in 63 wedstryde vir Engeland aangeteken het. As afrigter het hy Newcastle United terug na die Premierliga gelei, voordat hy ook Fulham, Engeland en Manchester City afgerig het.

Liverpool, Newcastle, die Engelse Sokkervereniging, Prins William en oudspelers soos Jamie Carragher en Alan Shearer, het Keegan geloof as een van die grootste en invloedrykste figure in die Engelse sokkergeskiedenis.