MIDDAG SPORT: RCB klop vir Mumbai, Arsenal bly op koers en F1 brul dalk weer met V8-enjins

Ons begin met krieket-nuus: Royal Challengers Bengaluru het hul senuwees gehou in ‘n dramatiese afronding om die Mumbai Indians met twee paaltjies te klop op die laaste bal van hul Tata IPL-kragmeting in Raipur.

Bhuvneshwar Kumar en Rasikh Dar het tien belangrike lopies in slegs drie aflewerings bygevoeg, met Bhuvneshwar wat ‘n ses geslaan het voordat Rasikh die oorwinning met twee lopies van die heel laaste bal af verseël het. Die oorwinning neem die Challengers tot 14 punte, gelyk met Sunrisers Hyderabad en Gujarat Titans aan die bopunt, terwyl Mumbai Indians en Lucknow Super Giants albei uitgeskakel is.

In sokker-nuus: Arsenal het sy kanse op Premierliga-sokkerglorie aan die lewe gehou met ’n dramatiese en redelik omstrede oorwinning van 1-0 oor West Ham United in die Londen-stadion in Engeland

Netwerk24 skryf die Gunners is na dese op 79 punte en vyf voor Manchester City, wat een wedstryd minder gespeel het. ’n Doel deur Leandro Trossard in die 82ste minuut het op die oog af die oorwinning vir Arsenal verseël. Maar die tuisspan het in die doodsnikke ’n ander einde aan die wedstryd in gedagte gehad.

Die Hammers het in bykomende speeltyd die gelykmaker aangeteken, maar Callum Wilson se doel is ongeldig verklaar nadat die video-beampte (VAR) beslis het dat die Gunners se doelwagter, David Raya, deur die Portugese speler Pablo verhoed is om die bal uit die lug te pluk.

Manchester City het vroeër die druk op Arsenal gelaai deur Brentford met 3-0 te troef. City kan die Gunners se voorsprong na twee punte laat krimp as hy Woensdag tuis teen Crystal Palace te staan kom. Nottingham Forest en Newcastle United het Sondag met 1-1 gelykop gespeel.

En, in motorsport: Die FIA ondersoek ’n moontlike terugkeer na V8-enjins om Formule 1 te vereenvoudig en die sport se ikoniese klank terug te bring. President Mohammed Ben Sulayem meen ’n oorskakeling teen 2031 is net ’n kwessie van tyd, met die doel om weg te beweeg van ingewikkelde hibriede krageenhede, terwyl volhoubare brandstofdoelwitte steeds gehandhaaf word.

IOL berig Formule 1 kan op die rand van ’n dramatiese terugkeer na sy harde, rou oorsprong wees, met planne om V8-enjins teen die einde van die dekade terug te bring.

Sedert 2014 maak F1 gebruik van ingewikkelde V6-hibriede krageenhede — ’n skuif wat aanvanklik geloof is omdat dit die sport meer in lyn gebring het met padmotortegnologie en volhoubaarheidsdoelwitte. Hierdie enjins het egter berug duur en ingewikkeld geword, met toenemende kritiek van spanne, jaers en ondersteuners.

Die huidige 2026-regulasies steun selfs meer op hibriede tegnologie, met byna ’n gelyke 50/50-verdeling tussen verbrandings- en elektriese krag — ’n rigting wat kommer in die pitgebied onder jaers en ondersteuners laat ontstaan het. Die voorgestelde terugkeer van die V8 sal steeds volhoubare brandstof insluit, sodat F1 sy omgewingsverpligtinge kan nakom, terwyl die emosie van vroeër jare weer vasgevang word.

Ter illustrasie. FOTO: Unsplash