‘n Verdagte is betrap terwyl hy glo met dokumente peuter om sy ‘zama-zama-broers’ te help
’n Man is in Bloemfontein in hegtenis geneem nadat hy glo met verskeie vervalste en veranderde dokumente betrap is.
Volgens polisiewoordvoerder, luitenant-kolonel Thabo Covane, het lede van die Parkweg-misdaadvoorkomingseenheid hom by ’n internetkafee in die Ou Mark-kompleks aangetref waar hy glo besig was om besonderhede op ’n Suid-Afrikaanse identiteitsdokument te verander.
Die polisie het daarna verskeie identiteitsdokumente, paspoorte, geboorte- en doodsertifikate en ander veranderde dokumente in sy rugsak gevind.
’n Soektog by Phomolong het ook vertroulike DNS-dokumente, bankstate en Sassa-beëdigde verklarings aan die lig gebring.
Die man het glo aan die polisie gesê hy help sy zama-zama-broers, oftewel onwettige mynwerkers.
Hy staan tereg op aanklagte van bedrog, die besit van vermoedelik gesteelde eiendom en ’n oortreding van die Immigrasiewet.
Comments