Nog kinders sonder dokumente is in SA onderskep
- Saamgestel deur Nadia Pieters
- 2 days ago
- 1 min read
Die Grensbestuursowerheid (GBO) het kommer uitgespreek oor die onwettige beweging van kinders oor Suid-Afrika se grense nadat nog ses kinders sonder dokumentasie by die Beitbridge-grenspos in Limpopo aangekeer is.
SABC News berig ’n taxibestuurder is in hegtenis geneem nadat die kinders glo sonder ouers of wettige dokumente vervoer is — iets wat owerhede as mensesmokkelary klassifiseer.
Die GBO sê die kinders is aan die Departement van Maatskaplike Ontwikkeling oorhandig en sal met hul families in Zimbabwe herenig word.
Volgens die kommissaris van die GBO, Michael Masiapato, bly dit onwettig om kinders sonder dokumentasie oor grense te vervoer, selfs al is dit op versoek van ouers.
Dit kom te midde van ’n onlangse voorval waar 32 ongedokumenteerde Zimbabweërs — insluitend kinders — buite Bloemfontein op die N1 voorgekeer is.
Die Vrystaatse polisiewoordvoerder, Thabo Covane, sê dié groep sal na verwagting Dinsdag in die Bloemfonteinse landdroshof verskyn.
Comments