OGGEND SPORT: Buthelezi en Sadie sluit aan by die Bok-kamp, Indië behaal ‘n rekord-Toetsoorwinning en WhatsApp kry 'n Trionda-emoji

Saamgestel deur Jana Roos
1 day ago
2 min read

Ons skop af met rugby-nuus: Die Sharks-losvoorspeler, Phepsi Buthelezi en Bordeaux Begles-stut Carlu Sadie, is by die Springbok-oefengroep in Johannesburg gevoeg voor die internasionale seisoen.

Buthelezi sal by die groep aansluit ná die Stormers se terugkeer uit Ierland, terwyl Sadie Woensdag sal aankom na sy verpligtinge met die Europese kampioene, Bordeaux Bègles.

Die Springbokke het gister met hul voorbereidings op die veld begin vir die seisoen-openingswedstryde teen die Barbarians en Zimbabwe A by die Nelson Mandelabaai-stadion op 20 Junie.

Afrigter, Rassie Erasmus, het die twee by die groep verwelkom en sal die Nasieskampioenskap-groep op 21 Junie aankondig.

In krieket: Indië het die grootste toetsoorwinning in hul geskiedenis behaal nadat hulle Afghanistan met ‘n beurt en 300 lopies op die derde dag van hul eenmalige wedstryd verslaan het.

Die gashere het op 546-8 verklaar, met kaptein Shubman Gill en KL Rahul wat albei honderdtalle aangeteken het.

Afganistan is vir 152 in hul eerste beurt uitgehaal, met die debutant-draaier, Manav Suthar, wat ses paaltjies geneem het. Die besoekers het toe vir 112 in hul tweede beurt ineengestort toe Washington Sundar en Kuldeep Yadav sewe paaltjies gedeel het, met die aandag nou op die drie-wedstryd eendagreeks wat Saterdag begin.

En in ‘n bietjie ligter nuus uit die wêreld van sokker: Aanhangers wat die sokker-emoji op WhatsApp gebruik, sal nou die Adidas Amptelike Wedstrydbal sien verskyn in sy plek dwarsdeur die FIFA Wêreldbeker-toernooi as deel van ‘n nuwe globale vennootskap. Die Trionda-simboolontwerp bring hulde aan Kanada, Mexiko en die Verenigde State, waar die toernooi plaasvind.

Die aktivering sal die toernooi se wedstrydbal direk in alledaagse gesprekke bring, met ondersteuners wat sleuteloomblikke kan deel, voorspel en vier. WhatsApp het die omvang van ondersteunerbetrokkenheid wat verwag word, na rekordbrekende boodskapvolumes tydens vorige toernooie beklemtoon.