OGGEND SPORT: Coke bring ondersteuners nader aan die Bokke, Bethell se besering lei tot ‘n verandering van kapteinskap en SA is gereed vir die Statebond-uitdaging
- Saamgestel deur Jana Roos
- Jul 22
- 2 min read
Ons skop af met rugby-nuus: Coca-Cola Suid-Afrika het sy Coca-Cola Fan Can Be a Bok-veldtog weer bekend gestel, wat ondersteuners die geleentheid bied om ‘n Springbok-wedstryddag van binne die nasionale span se kamp te ervaar tydens die tuis-toetsreeks van 2026.
Gelukkige ondersteuners sal deur afrigter, Rassie Erasmus, gekontak word voordat hulle by die groep aansluit vir aktiwiteite soos die kapteinsoefensessie, ‘n verblyf in die spanhotel, die stap deur die tonnel en die bywoon van die wedstryd saam met Springbokke wat nie speel nie.
Boonop sal een wenner na Frankryk reis om die span tydens hul toer te ondersteun.
Die veldtog stel ook ‘n nuwe reeks beperkte-uitgawe-blikkies vir ondersteuners bekend wat 20 Springbokspelers, insluitend vyf sterre van die Springbokvroue uitbeeld, met ‘n spesiale Rassie Erasmus-blikkie wat in Augustus vrygestel word.
In krieket-nuus: Die Engelse veelsydige speler, Jacob Bethell, se deelname aan die eerste toetswedstryd teen Pakistan volgende maand is onseker nadat hy weens ‘n kniebesering, wat hy tydens die onlangse eendagwedstryd-reeks teen Indië opgedoen het, nie aan The Hundred-toernooi kan deelneem nie.
Die 22-jarige het ‘n MRI-skandering ondergaan en sal met rehabilitasie begin, alhoewel die Engelse en Walliese Krieketraad nog nie bevestig het wanneer hy na verwagting weer sal speel nie.
Birmingham Phoenix begin Vrydag hul veldtog in The Hundred teen Trent Rockets, met Donovan Ferreira van Suid-Afrika wat as kaptein oorneem.
En, in atletiek-nuus: Atletiek Suid-Afrika se hoëprestasie bestuurder, Hezekiel Sepeng, sê die land se atletiekspan van 25 lede is goed voorbereid vir die Statebondspele in Glasgow.
Die groep ervare sterre sowel as opkomende talent sal by hul spanmaats aansluit wat reeds in Europa meeding voordat die kompetisie begin.
Sepeng glo die Spele sal waardevolle ervaring aan jonger atlete bied met die oog op die Olimpiese Spele van 2028.
Intussen het die huidige Afrika-afrigter van die jaar, Thabo Matebedi, ‘n aanbod aanvaar om Maleisië se hoofafrigter vir naelloopitems te word. Hy sê dat jare van finansiële worsteling en die gevoel dat sy werk in Suid-Afrika nie na waarde geskat word nie, sy besluit beïnvloed het en sal sy nuwe pos op 1 Augustus amptelik opneem.
Comments