OGGEND SPORT: Kolisi sê die Bokke is gereed vir die Franse uitdaging, Conrad soek bestendigheid in die Proteas se kolforde en, Man United neem afskeid van Carrick
Ons begin met rugby: Springbok-kaptein, Siya Kolisi en hulpafrigter Mzwandile Stick, verwag 'n taai stryd teen Frankryk in Vrydagaand se Nasieskampioenskap-toets in Parys, met die verrassende keuse van Antoine Dupont as losskakel wat 'n interessante dimensie by die tuisspan se aanval voeg.
Kolisi sê Dupont se veelsydigheid kom nie as 'n verrassing nie, aangesien die Bokke Frankryk se opsies op losskakel en skrumskakel bestudeer het en bly vol vertroue in hul verdedigingstelsel.
Stick het gewaarsku dat Dupont en Maxime Lucu van posisie kan ruil en probleme kan skep as hulle tyd en ruimte gegun word en het ook gewys op Frankryk se fisieke voorspelers en gevaarlike agterspelers.
Kolisi beklemtoon dat die oorwinning oor Frankryk in die kwarteindstryd van die 2023 Wêreldbeker in die verlede is, met die fokus op die nuwe uitdaging om Frankryk se fisiekheid en krag in vaste fasette te ewenaar, en om die standaarde te handhaaf wat van die Springbokke verwag word.
In krieket-nuus: Protea-afrigter, Shukri Conrad, wil voor Sondag se eerste toets teen Bangladesh op die Wanderers groter bestendigheid in die nommerdrie-posisie bewerkstellig, met Zubayr Hamza en die terugkerende Tony de Zorzi wat om dié plek meeding.
Albei het Donderdag lank gekolf, maar Conrad sê hy sal eers ná verdere oefening besluit wie speel, terwyl Matthew Breetzke voorlopig op nommmervyf beïndruk het en hy verwag dat die topsewe min sal verander.
Anrich Nortjé sal waarskynlik die eerste toets misloop weens sy liesbesering, hoewel hy goed herstel en moontlik vir die tweede toets beskikbaar kan wees.
Conrad beklemtoon dat Bangladesh nie onderskat kan word nie, ondanks hul onlangse nederlaag teen die Wes-Indiese Eilande, aangesien hulle Australië vroeër vanjaar geklop het en oor ’n sterker snelboulaanval en plaaslike afrigtingskennis beskik.
En, in sokker-nuus: Manchester United het hoofafrigter, Michael Carrick, afgedank ná 'n teleurstellende begin van die Engelse Premierliga-seisoen, waarin die klub slegs drie oorwinnings in 15 wedstryde behaal het.
Carrick se laaste wedstryd aan die stuur was 'n opwindende gelykopuitslag van 4-4 teen Aston Villa verlede naweek, 'n uitslag wat United in die relegasiesone gelaat het.
Die Red Devils beklee tans die agtiende plek op die punteleer met slegs agt punte uit 10 wedstryde.
Die voormalige Tottenham Hotspur-bestuurder, Mauricio Pochettino, wat tans die nasionale span van die Verenigde State afrig, is die gunsteling om Carrick te vervang.
Comments