OGGEND SPORT: Tuisvoordeel kan help in die SA Beker, SA Rugby belê in nasionale spanne en City hou die druk op Arsenal

Saamgestel deur Jana Roos
2 days ago
2 min read

Ons skop af met rugby-nuus: Die 2026 SA Beker bereik hierdie naweek die uitklopfase wanneer die verdedigende kampioene, die Airlink Pumas, Suzuki Griekwas, Toyota Cheetahs en Sanlam Boland Kavaliers, meeding om plekke in volgende Saterdag se eindstryd.

Die Cheetahs sal vol selfvertroue na hul dramatiese oorwinning oor die Griekwas verlede naweek by Mbombela-stadion aankom om die Pumas Vrydagaan dte ontmoet. Saterdag se tweede halfeindstryd sien die puntelys-topspelers, Griekwas vir Boland verwelkom in Kimberley, met die twee wenspanne wat deurdring na die SA Beker-finaal op 23 Mei.

SA Rugby het 500 miljoen rand gedurende 2025 aan sy nasionale spanne bestee, insluitend die Springbokke, Blitsbokke, Junior Bokke en Springbok-vrouespan.

Volgens syfers wat by die unie se algemene jaarvergadering in Kaapstad aangebied is, het die totale inkomste met 29 persent tot twee miljard rand gestyg. Uitvoerende hoof, Rian Oberholzer, sê die belegging het sterk resultate op die veld gelewer, met die Blitsbokke wat die HSBC SVNS Wêreldkampioenskap gewen het, die Junior Bokke wat die Onder-20 wêreldtitel opgelig het en die Springbok-vrouespan vir die eerste keer die Rugbywêreldbeker-uitspeelwedstryde gehaal het.

Handelswareverkope het ook aansienlik gegroei deur verhoogde aanvraag en die opening van Springbok-kleinhandelwinkels. Ten spyte van die styging in inkomste, het SA Rugby steeds ‘n verlies voor belasting van veertig miljoen rand aangeteken, hoewel die organisasie steeds vol vertroue is om langtermyn finansiële stabiliteit te bereik.

En, in sokker-nuus: Manchester City het in styl opgetree en Crystal Palace met 3-0 afgestof om stewig in die Premierliga-titeljaagtog te bly met twee wedstryde oor.

Antoine Semenyo en Omar Marmoush het voor rustyd by die Etihad-stadion aangeteken, terwyl Savinho die oorwinning laat in die wedstryd beklink het. Die oorwinning laat City twee punte agter die voorloper, Arsenal, hoewel Pep Guardiola se manne nou die beter doelverskil het terwyl die titelwedloop na ‘n dramatiese einde op pad is.

City pak volgende Chelsea in die FA Beker-finaal by Wembley, terwyl Palace hul aandag vestig op die UEFA Conference League-finaal teen Rayo Vallecano later vandeesmaand.