RUGBY: Die Cheetahs skraap deur teen die Sharks in ronde nommer drie van die Curriebeker-toernooi

Die Cheetahs het ’n begeesterde aanslag van die verdedigende kampioen die Sharks in die Sugar Ray Xulu stadion in Clermont, Durban afgeweer om uiteindelik die septer naelskraaps met 7 – 5 te kon swaai. Die besoekers het na 14 minute eerste punte aangeteken met ’n drie deur Neels Volschenk wat Ntokozo Makhaza verdoel het en in die 65^ste minuut het Phatu Ganyane oorgeval vir sy span se enigste punte. Die Pumas het in Pretoria die Bulle stukkend gespeel en ses drieë ingeryg in ’n wentotaal van 41 – 7 terwyl die Westelike Provinsie se treurmare voortduur toe die Griekwas hulle in Kimberley met 47 – 17 oorrompel het. Die Boland Kavaliers wat die nuweling in vanjaar se reeks is het op hul tuisveld in Wellington die gevaarlike Leeus verras en die Rooibontes met 29 - 10 in hul spore gestuit.