SOKKER: Man City struikel terwyl Arsenal die Premierliga lei

Saamgestel deur Jana Roos
Mar 5
1 min read

Manchester City het in die wedloop om die Premierliga-titel gestruikel nadat hulle tot ’n duur gelykopuitslag van 2–2 teen Nottingham Forest gehou is, terwyl Bukayo Saka se doel teen Brighton Arsenal se voorsprong tot sewe punte vergroot het.

SuperSport berig die Gunners is gunstelinge om hul eerste Engelse liga-titel sedert 2004 te wen, maar hulle sukkel steeds om die sterk Manchester City-span af te skud. Die twee spanne sal op 19 April by die Etihad-stadion teen mekaar te staan kom, maar hierdie jongste uitslae kan ’n groot invloed op die titelwedloop hê wanneer alles uiteindelik beslis word.

Saka het sy 300ste verskyning vir Arsenal gevier met ’n doel in die negende minuut by Brighton se Amex-stadion.

Die tuisspan het balbesit oorheers en meer skote op doel gehad, maar Arsenal het stand gehou en diep gegrawe om ’n spanningsvolle oorwinning van 1–0 te beklink.