Verdagtes is in Bloemfontein met Centlec-toerusting vasgetrek
Vier verdagtes is in hegtenis geneem nadat elektriese infrastruktuur ter waarde van sowat R110 000 by Centlec se perseel in Oranjesig, Bloemfontein, teruggevind is.
Volgens Bloemfontein se kragverskaffer het sekuriteitswagte ’n anonieme wenk ontvang oor vermoedelike gesteelde koperdraad en meterbokse wat in sportsakke versteek is.
Sekuriteitspersoneel het daarna ’n munisipale vullisverwyderingsvragmotor onderskep toe dit die Centlec-perseel verlaat.
Daar is tydens ‘n deursoeking 48 meterbokse met sleutelblokke asook koperdraad, elektriese versmeltings en ander kabels in swartsakke binne die vragmotor gevind.
Die vier mans is aan die polisie oorhandig en sal na verwagting binnekort in die Bloemfonteinse landdroshof verskyn op aanklagte wat met diefstal en peutering met noodsaaklike infrastruktuur verband hou.
Comments