AfriForum beskuldig die ANC vir SA se swak verhouding met die VSA

Volgens die burgerregteorganisasie AfriForum pluk Suid-Afrika en sy mense nou die wrang vrugte van die ANC-leierskap in die regering se roekelose beleidsrigtings en tartende optrede teenoor die VSA. Die uitvoerende hoof van AfriForum, Kallie Kriel, sê die ANC-leiers het hul eie ideologie en belange sowel as dié van hul party bo die belange van die burgers van Suid-Afrika gestel. Dit is met verwysing na die tariewe wat die Amerikaanse president, Donald Trump, teen invoere vanuit Suid-Afrika ingestel het. Kriel sê die ANC is self verantwoordelik vir die swak verhouding tussen die twee lande en moet nie die blaam op burgerorganisasies verskuif nie.