Agt jong Suid-Afrikaners pryk op 'n gesogte Forbes-lys

Saamgestel deur Ilde Roos
Jun 23
1 min read

Nie minder nie as agt jong Suid-Afrikaanse baanbrekers is op Forbes Africa se 30 Under 30- klas van 2026 aangewys. Dit maak Suid-Afrika die land met die meeste verteenwoordigers op dié lys.

Good Things Guy berig die Forbes Africa 30 Under 30- lys vereer entrepreneurs, kreatiewes, sportlui en veranderingsagente onder 30 wat ’n beduidende impak in hul onderskeie velde maak.

In die sportkategorie is die Protea-ster Marco Jansen, die middelafstandsensasie Prudence Sekgodiso en Orlando Pirates-ster Relebohile Mofokeng.

In besigheid het Rayhaan Survé erkenning ontvang vir sy werk in entrepreneurskap en innovasie, terwyl Thapelo Nthite vereer is vir sy mede-stigting van Botlhale AI, ’n onderneming wat veeltalige kunsmatige-intelligensiehulpmiddels ontwikkel om taalhindernisse regoor Afrika af te breek.

In die lugvaartbedryf het Melissa Vezasie haar passie vir vlieg omskep in ’n platform wat toekomstige vlieëniers opvoed.

Brad Dayan Norman is vereer vir die bou van ’n suksesvolle boksbevorderingsmaatskappy nadat hy van ’n sokkerloopbaan oorgeskakel het, terwyl die amapiano-ster Zandile Zee Nxumalo haar merkwaardige opgang in Suid-Afrika se musiekbedryf voortsit.