'Amerikaanse' amptenaar bedrieg glo Bloemfonteiner

Byna R100 000 is van ’n slagoffer afgerokkel, glo deur ’n man wat homself as ’n Amerikaanse regeringsamptenaar voorgedoen het. Volgens Daily News het die verdagte op Maandag 26 Mei in die landdroshof in Bloemfontein verskyn op aanklagte van bedrog en geldwassery. Die Valke sê die beskuldigde het in Desember 2022 ’n e-pos aan die slagoffer gestuur oor ’n sogenaamde COVID-19-hulpfonds, en versoek dat sy byna R86 000 in ’n spesifieke bankrekening inbetaal. Die slagoffer het later agtergekom haar vriendin se Facebook-profiel is glo deur die verdagte gekaap. Hy is op 21 Mei in die Wes-Kaap in hegtenis geneem na ’n ondersoek deur die Valke se eenheid vir ernstige korrupsie. Die voorval dien as waarskuwing oor die gevare van aanlyn-bedrog.