Anti-bende hoof, top beamptes verdink in Kinnear-moord

Die voormalige hoof van die Anti-Bende-Eenheid en verskeie ander hoëvlak-polisiebeamptes is in ’n verslag oor die moord op die eenheid se speurder, Charl Kinnear, geïmpliseer. News24 berig die Onafhanklike Polisie-ondersoekdirektoraat (OPOD) het Woensdag aangekondig dat hulle ’n verslag oor die optrede van polisiebeamptes ná die Kinnear-moord gaan deklassifiseer. Van die nege beamptes wat in die OPOD-verslag geïmpliseer is, is sewe van die SAPD en twee van die Valke. Onder die hoëvlak-amptenare is brigadiers by beide provinsiale en nasionale Misdaadintelligensie en drie kapteins in die Anti-Bende-eenheid. Die verslag is in 2022 as “top geheim” geklassifiseer om sensitiewe inligting te beskerm. Dit is op 1 November 2024 gedeklassifiseer terwyl die saak tans in die Wes-Kaapse Hooggeregshof aangehoor word.