Ashley Oosthuizen se vonnis is verder verkort

Saamgestel deur Nadia Pieters
Jun 17
1 min read

Die Suid-Afrikaner Ashley Oosthuizen se tronkstraf in Thailand is verder verkort nadat die Thaise regering 'n koninklike kwytskelding aangekondig het.

Volgens Maroela Media is die kwytskelding toegestaan ter viering van koningin Suthida se verjaardag en kan dit na verwagting meer as 80 000 gevangenes bevoordeel.

Oosthuizen se ma, Lynn Blignaut, sê die familie is dankbaar teenoor almal wat hulle die afgelope jare ondersteun het.

Oosthuizen is in 2020 in Thailand op dwelmverwante aanklagte in hegtenis geneem en is later skuldig bevind aan internasionale dwelmhandel. Haar doodsvonnis is later na lewenslange gevangenisstraf verander en daarna verskeie kere verminder.

Haar huidige vonnis staan nou op nege jaar en 11 maande.

Volgens inligting wat deur haar ondersteuningsnetwerk bekend gemaak is, het sy reeds meer as vyf en 'n half jaar van haar vonnis uitgedien, wat beteken dat sy reeds meer as die helfte van haar huidige vonnis voltooi het.