Bfn polisie vang 'n voortvlugtige ná 'n dekade se soek
- Saamgestel deur Ilde Roos
- Jul 23
- 1 min read
'n Tien jaar lange vlug van die gereg het Dinsdagaand tot 'n einde gekom toe 'n voortvlugtige in hegtenis geneem is wat vir 'n misdaad gesoek is wat byna twee dekades gelede gepleeg is.
Polisiewoordvoerder sersant Mahlomola Kareli sê Patrick Machuto was sedert 2015 op die vlug nadat hy versuim het om in die hof te verskyn in verband met 'n moord- en roofsaak wat in 2007 in die Kopanong-gebied naby Bloemfontein aangemeld is.
Rosestaad-nuus se Ilde Roos verduidelik verder die Vrystaatse span het na aanleiding van inligting oor Machuto se moontlike verblyfplek na Noordwes gereis.
LUISTER HIER:
TRANSKRIPSIE:
By Lehurutse in Noordwes het ondersoekers vasgestel dat Machuto onlangs vir 'n afsonderlike saak van aanranding in hegtenis geneem is en later die maand weer in die hof moes verskyn. Reëlings is daarna tussen die Vrystaatse opsporingspan en die plaaslike ondersoekbeampte getref om die hofrol dop te hou en die span onmiddellik in kennis te stel sodra die verdagte in die hof verskyn. Toe Machuto Dinsdag in die hof verskyn, het die span vanaf Bloemfontein vertrek en die uitstaande lasbrief vir sy inhegtenisneming uitgevoer.
Die verdagte is dadelik uit aanhouding na Bloemfontein vervoer, waar hy tereg sal staan op aanklagte van moord en roof wat met die 2007-Kopanong-saak verband hou, asook bykomende aanklagte omdat hy versuim het om in die hof te verskyn.
Comments