Bfn se staatslykshuis is gesluit vir lykskouings

Die departement van werkskepping en arbeid het die afdeling van Bloemfontein se staatslykhuis waar lykskouings gedoen word, gesluit.

Netwerk24 berig dié afdeling is Donderdag gesluit omdat die werkstoestande nie aan die nodige vereistes voldoen nie.

’n Verteenwoordiger van die Vereniging van Staatsamptenare, Lynsie Pelser, sê die departement het Woensdag reeds die toestande in die lykhuis ondersoek. Die ventilasie is foutief en elektriese herstelwerk moet gedoen word. Daar moet ook ’n diensverskaffer aangestel word om die deel waar lykskouings plaasvind, skoon te maak. Pelser sê die lykshuis het voorts nie warm water nie.

Die woordvoerder van die Vrystaatse gesondheidsdepartement, Mondli Mvambi, het nie op herhaalde navrae gereageer nie. Dit is nie duidelik wanneer die gesondheidsdepartement aan die kwessies gaan aandag gee en wanneer lykskouings hervat sal kan word nie.

Die staatslykshuis in Bloemfontein. FOTO: Roodt Architects