Bloemfontein se soek-en-reddingshond Parko lewer die polisie se feestydplan per helikopter af

’n Vierjarige Belgiese herdershond van die polisie se honde-eenheid in Bloemfontein gaan Woensdag ’n spesiale rol speel wanneer die Vrystaatse polisie hul feestydoperasie in Bultfontein bekendstel.

Volgens die Vrystaatse polisie sal Parko saam met sy hanteerder, adjudant-offisier Swannie Swanepoel, per polisiehelikopter invlieg om die operasionele plan aan die provinsiale polisiekommissaris, lt.genl. Thabang Lesia, te oorhandig.

Die polisie sê die ongewone oorhandiging sal die belangrike bydrae van gespesialiseerde honde-eenhede tot polisie-optrede en misdaadvoorkoming beklemtoon.

Parko en Swanepoel simboliseer ook die toewyding van polisiebeamptes en hul viervoetige helpers om gemeenskappe gedurende die feestyd veiliger te hou.

FOTO: Verskaf