Bloemfontein-tronkbewaarders moet in die hof verskyn ná ’n gevangene se dood

Vier bewaarders van die Mangaung G4S-gevangenis in Bloemfontein verskyn na verwagting Woensdag in die hof vir die beweerde moord op ’n gevangene. Rosestad-nuus het vroeër berig dat Mpho Mkhumbeni moontlik in sy tronksel deur bewaarders vermoor is nadat hy glo kontant van beamptes gesteel het. LEES MEER: Mangaung-tronkbeamptes word van ’n gevangene se moord verdink Agt amptenare is ook kort na die insident geskors nadat die oorledene saam met drie ander gevangenes aangerand en gemartel is. LEES OOK: Mangaung-korrektiewe sentrum: Amptenare geskors na dood van gevangene Volgens ’n polisieverklaring is die vier bewaarders Dinsdagaand in hegtenis geneem ná ’n nadoodse ondersoek wat onthul het dat die slagoffer aan onnatuurlike oorsake gesterf het. Hy is op 12 Maart dood aangetref en daar is aanvanklik vermoed dat natuurlike oorsake die rede was. ’n Geregtelike doodsondersoek is geopen, maar ondersoekbeamptes het dit later na ’n moordondersoek verander. Volgens die polisie sal die ondersoek voortgaan om geregtigheid vir die oorledene te verseker.