Departement van Basiese Onderwys gereed vir matriekeksamens

Die minister van Basiese Onderwys, Siviwe Gwarube, sê die departement het baie werk gedoen om beide die kandidate en die stelsel vir vanjaar se nasionale Senior Sertifikaat (NSS)-eksamen voor te berei. Die minister het die Portefeuljekomitee oor Basiese Onderwys ingelig oor die stand van gereedheid vir vanjaar se Oktober en November graad 12-eksamen. Die departement het berig dat 732 448 voltydse kandidate vir vanjaar se eksamens ingeskryf is, en 162 vraestelle is goedgekeur en gereed vir oorhandiging aan provinsies. Die eksamens duur van 21 Oktober tot 27 November, en die nasien sal onmiddellik daarna begin. Die uitslae sal op 16 Januarie 2025 aan kandidate bekend gemaak word.