Die gesondheidsdepartement sloer met die vul van Vrystaatse doktersposte
- Ilde Roos
- 5 days ago
- 1 min read
Terwyl ander provinsies vakatures begin adverteer het om dokters ná hul gemeenskapsdiens aan te stel, is baie dokters in die Vrystaat steeds werkloos.
Dit nadat die departement van gesondheid tot dusver geen poste vir dokters geadverteer het sedert die begin van die nuwe finansiële jaar nie.
Netwerk24 berig die nasionale tesourie het intussen reeds geld toegeken vir die indiensneming van dokters wat tans werkloos is.
Die sameroeper van die mediese vakbond Samatu in die Vrystaat, Pule Nkate, sê dié nalatigheid vererger die personeeltekorte binne gesondheidsorginstellings in so ’n mate dat sommige dokters take moet verrig wat wyer strek as dié van ’n dokter, om die beste sorg aan pasiënte te lewer.
Nkate sê hulle is bereid om ’n gesonde verhouding met die departement voort te sit, maar hulle eis vinnige reaksie.
Die woordvoerder van die Vrystaatse gesondheidsdepartement, Mondli Mvambi, sê hy moet eers inligting van hul menslikehulpbronne- en finansiële afdeling verkry voordat hy kan reageer.
Comments