Die hooggeregshof sê ook vir Dezzi nee

Die 50-jarige Desiree Liebenberg, vrou van die vermeende diamantsmous Louis Liebenberg, se aansoek om teen die weiering van haar borgtog te appelleer, is in die Pretoriase hooggeregshof van die hand gewys. Maroela Media berig regter Mashudu Munzhelele het bevind die landdroshof op Bronkhorstspruit het nie gefouteer deur Dezzi, soos Desiree bekend staan, se borgtogaansoek te weier nie. Die hof het in November verlede jaar bevind Dezzi was onder meer nie eerlik met die hof oor waar sy gaan woon indien sy wel op borgtog vrygelaat sou word nie. Dezzi, Louis en nog sewe beskuldigdes, staan tereg op 59 aanklagte van bedrog, vyf aanklagte van swendelary, ses aanklagte van geldwassery, diefstal en verskeie statutêre oortredings.