Die Kaapse Klopse kan vanjaar regstreeks op televisie gesien word

Saamgestel deur Ilde Roos
Jan 5
1 min read

Kaapstad se bekende en tradisionele "Tweede Nuwe Jaar", met ongeveer 20 000 deelnemers aan die Kaapse Klopse- parade, gaan vir die eerste keer op nasionale televisie uitgesaai word.

Die optog skop Maandag om 11:00 af, met die regstreekse uitsending wat om 12:00 op SABC2 begin.

EWN berig Kaapstad se woordvoerder, Luthando Tyhalibongo, sê na verwagting gaan tienduisende toeskouers langs die parade se roete staan soos dit deur die stad beweeg na die DHL-stadion. Die Kaapse Klopse Karnaval-Assosiasie se kompetisie sal dan om 17:00 begin.

Tyhalibongo sê die historiese uitsending sal alle Suid-Afrikaners die geleentheid gee om deel te hê aan die vreugde, trots en skouspel van die parade, wat dit weer as 'n verenigende kulturele oomblik sal herbevestig.