Die oorsaak van die ongeluk op die N3 moet nog bepaal word

Die polisie moet nog die oorsaak van die ongeluk bepaal waarin agt mense op die N3-snelweg tussen Van Reenenspas en Montrose in die Vrystaat dood is.

Ses ander mense is beseer en na die Thebe-hospitaal in Harrismith geneem nadat 'n minibus-taxi en 'n vragmotor Donderdagoggend gebots het.

SABC News berig 'n woordvoerder vir die verkeersinspektoraat, Sindi Msimang, sê die vragmotor was na bewering op 'n steilte toe dit krag verloor het.

Dit het toe agteruit gerol en met die aankomende minibus-taxi gebots. 'n Gedeelte van die pad was vir verkeer toegemaak.

FOTO: Maroela Media