Die parlement vergader oor die fiskale raamwerk en inkomstevoorstelle

Die Nasionale Vergadering en die Nasionale Raad van Provinsies sal vandag in afsonderlike sittings vergader om die fiskale raamwerk en inkomstevoorstelle vir die 2025-begroting te oorweeg. Die raamwerk is die bloudruk vir hoe die land beplan om inkomste in te samel, geld te bestee en die land se skuld te bestuur. Daar word verwag dat dit vandag wel deurgestem sal word met die hulp van onder andere die DA. Daar kan egter verwag word dat die twee grootste opposisiepartye, die MK-party en die EFF, die minister van finansies, Enoch Godongwana, se raamwerk sal uitdaag, met beide partye wat hewig gekant is teen ‘n verhoging in die brandstofheffing wat reeds in werking getree het.