Die polisie ontdek ‘n ‘begraafplaas’ vir gestroopte voertuie

Verskeie gesteelde en gestroopte voertuie is op 'n terrein in die De Deur-gebied in Gauteng ontdek tydens 'n intelligensie-gedrewe polisie-operasie.

Volgens The Citizen het die polisie op die terrein toegeslaan nadat inligting ontvang is dat gekaapte voertuie daarheen geneem word nadat waardevolle onderdele verwyder is.

Beamptes het talle uitgebrande en gestroopte voertuigwrakke op die eiendom gevind, waaronder 'n Mercedes-Benz, Audi en VW Polo.

Die Suid-Afrikaanse Polisiediens sê verskeie voertuie is reeds as gesteel geïdentifiseer, terwyl een voertuig met 'n kaping- en moordsaak verbind word.

Forensiese ondersoeke na die oorblywende voertuie duur voort.

FOTO: The Citizen