Die UV lewer twee Fulbright-navorsers op

Twee navorsers aan die Universiteit van die Vrystaat (UV) het 'n mylpaal-prestasie bereik deur in dieselfde toekenningsiklus vir die Fulbright Suid-Afrikaanse Navorsersprogram gekies te word. Volgens die UV se webtuiste is dit die eerste keer dat die universiteit twee Fulbright-toekennings in dieselfde jaar ontvang.

Die Fulbright-program, wat deur die Amerikaanse Departement van Buitelandse Sake bestuur word, is een van die wêreld se mees gesogte akademiese uitruilprogramme en bevorder navorsingsuitnemendheid, internasionale samewerking en wedersydse begrip deur onderwys.

Die twee navorsers, WP Wahl en Zoleka Dikana, fokus op verskillende navorsingsvelde, maar deel dieselfde doel: om kennis te gebruik om dringende maatskaplike uitdagings aan te spreek en navorsingsamewerking tussen Suid-Afrika en die VSA te versterk.

Wahl, van die Departement Kurrikulumstudies en Hoër Onderwys in die Fakulteit Opvoedkunde, sal sy Fulbright-navorsingsprojek aan die Universiteit van Massachusetts in Boston se Kollege vir Opvoedkunde en Menslike Ontwikkeling uitvoer.

Dikana, van die kantoor van die dekaan in die Fakulteit Opvoedkunde, sal tyd aan die George Mason Universiteit deurbring.

WP Wahl en Zoleka Dikana. FOTO: UV