Die Vrystaat kry deel van miljoene vir rampreaksie

Munisipaliteite in die Vrystaat is onder dié wat sal deel in meer as R417 miljoen wat die Nasionale Tesourie vir rampreaksie bewillig het.

Volgens die Tesourie gaan R213,4 miljoen gedurende die 2026/27-boekjaar aan 41 munisipaliteite in ses provinsies vir rampreaksiemaatreëls.

Die Vrystaat is saam met die Oos-Kaap, Wes-Kaap, Mpumalanga, Noordwes en Noord-Kaap by die toekenning ingesluit.

’n Verdere R203,8 miljoen is reeds in die 2025/26-begroting opsy gesit om munisipaliteite met vloedverwante intervensies te ondersteun.

Die befondsing is daarop gemik om plaaslike owerhede vinniger in staat te stel om op skade aan infrastruktuur en gemeenskappe te reageer wanneer rampe plaasvind.

Besonderhede oor hoeveel van die totale bedrag spesifiek aan Vrystaatse munisipaliteite toegewys is, is nie bekend nie.