Discovery lê 'n mosie voor oor gender-diverse mense se gesondheidsorg

Die grootste mediese skema in die land gaan 'n mosie aan sy lede voorlê om sy gesondheidsorgbenadering vir transgender- en genderdiverse mense te hersien. Dit is sover bekend die eerste mediese fonds wat ’n besluit van dié aard aan sy lede voorlê.

Netwerk24 berig Discovery Health gaan Donderdag sy lede vra om die mosie te ondersteun.

Volgens Discovery is transgender- en genderdiverse Suid-Afrikaners lede van die skema en moet, soos ander lede, toegang hê tot toepaslike gesondheidsorg, behoorlike inligting, billike prosesse en waardige behandeling.

Die doel van die voorgestelde hersiening is om te bepaal of Discovery se huidige benadering ooreenstem met die jongste mediese inligting oor behandeling en sorg, sowel as grondwetlike waardes en die mediese fonds se waardes.

Die Wêreldgesondheidsorganisasie (WGO) het sy mediese riglyne bygewerk deur transgender en genderdiverse identiteite te herklassifiseer. Die belangrikste verandering is dat transseksualiteit en genderidentiteitsversteuring uit die hoofstuk oor geestes- en gedragsversteurings verwyder is.

Die hersiening sal Discovery die geleentheid bied om bewysgegronde gesondheidsorgbestuur toe te pas en reaktief te bly oor veranderende gesondheidsbehoeftes.

Ná die hersiening sal die bevindinge en aanbevelinge aan lede teruggerapporteer word.

Ter illustrasie. FOTO: Wix