Drie jaar ná die slikdamramp is Jagersfontein-huise byna voltooi

Meer as drie jaar ná die ineenstorting van die Jagersfontein-myn se slikdam, het die Vrystaatse Uitvoerende Raad bevestig dat 134 huise óf herbou óf herstel is.

Central News berig lede van die raad het die omvangryke werk wat deur die verantwoordelike mynmaatskappy verrig is, verwelkom.

Die slikdam-ineenstorting op 11 September 2022 het dele van Charlesville en Itumeleng in Jagersfontein verwoes en sowat 170 huise beskadig. Buiten die 134 huise se herstel het 'n verdere 10 gesinne kontantvergoeding of alternatiewe behuisingsreëlings ontvang, wat die totale aantal begunstigdes wat bygestaan is op 144 te staan bring. Alle bou- en rehabilitasiewerk is teen Mei 2025 voltooi.

'n Totaal van 26 begunstigdes is egter nog nie ten volle gevestig nie en het regstappe teen die myn ingestel. Hierdie sake dien steeds voor die howe.

Die Uitvoerende Raad het die voortgesette rol van die Nasionale Huisbouersregistrasieraad (NHBRC) en die Kopanong plaaslike munisipaliteit erken in die toesig oor die gehalte en voltooiing van die herboude huise.

Die slikdam-ramp in 2022. FOTO: Maroela Media